ఉషా మాధవం...శాన్ అంటోనియో సంక్రాంతి సంబరం!








పోయిన వారం శాన్ ఆంటోనియో సంక్రాంతి సంబరాలకి వెళ్ళాం. మూడు గంటలకు పైగా జరిగిన ఈ సంబరాల్లో తెలుగు వాళ్ళు పాటలు పాడారు, నృత్యాలు చేశారు, తెలుగు దేశంలో సంక్రాంతి నిజంగా అంత బాగా చేసుకుంటున్నారో లేదో తెలియదు కానీ, శాన్ ఆంటోనియోలో వున్న ఆ మూడు గంటలూ తెలుగు దేశపు సంక్రాంతి శోభని తలచుకునేలా చేశారు. అన్నిటికి కంటే నాకు బాగా నచ్చింది – గోవిందరాజు మాధవ రావు గారిని శాన్ ఆంటోనియో తెలుగు వాళ్ళు సత్కరించడం! ఇది కూడా మాధవరావు గారికి తెలియకుండా ఒక “సర్ ప్రైజ్” లాగా చేశారు మూర్తి గారు. ఈ “సర్ ప్రైజ్” కోసం రెండు నెలలు ముందు మమ్మల్ని సిద్ధం చేశారు. మామూలుగా శాన్ ఆంటోనియో ఎప్పుడు వెళ్ళినా మాధవరావు గారి ఇంట్లో దిగే మేం, ఈ ‘సర్ ప్రైజ్’ లో భాగంగా మాగంటి ఉష (ప్రముఖ రచయిత మాగంటి కోటేశ్వర రావు గారి అమ్మాయి) ఇంట్లో దిగాం.

టెక్సాస్ లో తెలుగు వాళ్ళకి శాన్ ఆంటోనియో అంటే వెంటనే గుర్తొచ్చే పేరు గోవింద రాజు మాధవరావు! టెక్సస్ లో ఎక్కడయినా ఏ తెలుగు వేడుకయినా, తెలుగు వాళ్ళకి సంబంధించిన కార్యక్రమమయినా జరిగితే అక్కడ గోవిందరాజు మాధవ రావు గారి కుటుంబం వుండి తీరుతుంది. మాధవరావు గారు ఒక్కరే కాదు, ఆయనతో పాటు ఉష గారు! వాళ్ళిద్దరిలో ఏ ఒక్కరి పేరు మినహాయించినా అది అసంపూర్ణంగా వుంటుంది. వాళ్ళిద్దరూ కలిసి చేసే సేవల్లో ఎవరికెంత వాటా దక్కాలి అన్నది అంత తేలికగా తేలే విషయం కాదు. కానీ, ఉష గారికి సింహ భాగం దక్కాలని నా వాదన అనుకోండి. (మేము శాన్ ఆంటోనియో వెళ్ళినప్పుడల్లా ఉష గారు మా కోసం దోసకాయ పచ్చడి వొక సీసాడు ఇస్తారన్న రహస్యం కూడా ఇందులో వుందనుకోండి. ఆ దోసకాయ పచ్చడి వేసుకుని తిన్నప్పుడల్లా మేము ఉష గారిని తప్పక తలచుకుంటాం కాబట్టి మాకు కొంచెం ఉష గారి పక్షపాతం. ఇక వాళ్ళిద్దరి కనుపాపలు సంజాత, స్వపంతి ఎక్కువ అమెరికాలోనే పెరిగినా అచ్చ తెలుగు ఆడపిల్లలు)

అమెరికాలో పేరుకి చాలా మంది తెలుగు సమాజ సేవకులు వున్నారు. కొంత మంది స్వయం ప్రకటిత కాగితప్పులులూ వున్నారు. వాళ్ళ సేవలు కాగితాలకే పరిమితం. అమెరికా తెలుగు సమాజం అంటూ పెద్ద కబుర్లు చెప్తారు, రాస్తారు, ఆంధ్రా వెళ్ళి వూదర కొట్టుకుంటారు. కానీ, చిన్న సాయం అందించడానికి చేయి ముందుకి రాదు. (అది ఎప్పుడూ ప్యాంటు జేబుల్లోనో, కోటు జేబుల్లోనో కూరుకు పోయి వుంటుంది). వీళ్ళు మహా అయితే, పదవుల కోసం పోటీ పడ్తారు. తెలుగు సంస్కృతికి తామే పదహారణాల ప్రతినిధులమని బోర్డులు పెట్టుకుంటారు. అలాంటి హంగూ ఆర్భాటం ఏమీ లేకుండా, ఒక చేత్తో చేసిన సాయం ఇంకో చేతికి కూడా తెలియకుండా సాయపడే వ్యక్తులు తక్కువ.

నిశ్శబ్దంగా తమ కృషి తాము చేసుకుంటూ వెళ్ళే మాధవరావు గారి కుటుంబం పెద్ద కబుర్లు చెప్పే కుటుంబం కాదు. తెల్లారి లేచి పేపర్ లో పేరు పడిందా లేదా అని వెతుక్కునే రకం కాదు. ఏ సంఘంలో తమకి ఎంత హోదా ఇచ్చారని లెక్కలు వేసుకునే వాళ్ళు కాదు. అక్కర వున్న వారికి వెంటనే నిస్సంకోచంగా సాయం అందించడం వొక్కటే వాళ్ళకి తెలుసు. మేం టెక్సాస్ వచ్చి మూడేళ్లే అయ్యింది. కానీ, ముప్పయ్యేళ్లుగా టెక్సాస్ లో వున్న తెలుగు వాళ్ళు ఈ విషయం ఇంకా బాగా చెప్పగలరు.

వరంగల్ దగ్గిర హనమ కొండ మాధవరావు గారి సొంతూరు. అక్కడ ఆర్. ఈ. సి. లో ఆయన చదువుకున్నారు, తరవాత విక్రమ్ సారాభాయి స్పేస్ సెంటరులో పనిచేశారు. 1991 లో అమెరికాలో అడుగుపెట్టారు. ప్రవాస తెలుగు సంఘాలతో ఆయన అనుబంధం త్రివేండ్రం నించి మొదలయ్యింది. 1979 లో ఆయన త్రివేండ్రం సాంస్కృతిక సంఘానికి కార్యదర్శిగా వుండే వారు. శాన్ ఆంటోనియో వచ్చాక ఆయన టెక్సాస్ సాహిత్య సదస్సులలో పాల్గొనడం మొదలు పెట్టారు. మొదటి నించీ సాహిత్యం పట్ల వున్న అభిరుచి వల్ల సాహిత్య సదస్సులలో ఆయనకి క్రియాశీలక పాత్ర దక్కింది. టెక్సాస్ వచ్చిన తెలుగు రచయితలని ఎవరినయినా ఆయన మొదట శాన్ ఆంటోనియో తెలుగు వారికి పరిచయం చెయ్యడం మొదలు పెట్టారు. ఆ విధంగా స్థానికంగా సాహిత్య, భాషాభిమానాన్ని పెంచే కృషి శాన్ ఆంటోనియోలో మొదలయ్యింది. టెక్సాస్ యూనివర్సిటీ తెలుగు కమిటీలో ఆయన టాస్క్ ఫోర్స్ సభ్యుడు. అంతే కాదు, తెలుగు భాషలో బాగా ప్రతిభ కనబరచిన ఇద్దరు విద్యార్ధులకి టాసా (శాన్ ఆంటోనియో తెలుగు సంఘం) తరఫున ఏటా రెండు స్కాలర్షిప్పులు ఇప్పిస్తున్నారు. మొట్ట మొదటి సారి 2007 లో పెద్ద ఎత్తున తెలుగు నాటకోత్సవాలు కూడా నిర్వహించారు. ఒక తెలుగు వ్యక్తి గానే కాక, ఒక శాస్త్రవేత్తగా టెక్సాస్ లో ఆయన వివిధ శాస్త్ర సంఘాలలో ప్రముఖ పాత్ర పోషిస్తున్నారు.

ఉష గారు మొదటి సరిగా శాన్ ఆంటోనియో లో తెలుగు బడి మొదలు పెట్టారు. మొదట కొద్ది మంది పిల్లలతో మొదలయిన తెలుగు బడిలో ఇప్పటి దాకా కొన్ని వందల మంది పిల్లలకి తెలుగు నేర్పారు. మొన్న సంక్రాంతి వేడుకలలో తెలుగు బడి పిల్లలు మంచి జోకులు చెప్పి, అందరినీ కడుపుబ్బ నవ్వించారు. తెలుగు పాటలు పాడి, తెలుగు నృత్యాలు చేసి కనువిందు/ వీనుల విందు చేశారు. (అసలు విందు కూడా చాలా బాగుందండోయ్! పూర్ణాలూ, చక్ర పొంగలి, పులిహోర, పెరుగు మిరపకాయలూ వగైరా నా ఫావరైట్)

శాన్ ఆంటోనియోలో గోవిందరాజు కుటుంబం నాటిన తెలుగు మొక్క ఇప్పుడు పెరిగి పెద్దదయింది. ఆ తరం నించి ఈ తరానికి ఈ స్ఫూర్తిని అందించడానికి ఉత్సాహం ఉరకలేసే పాటమళ్ళ మూర్తి గారు, నిత్యయవ్వనోత్సాహి అడివి వెంకటేష్ లాంటి వారు ముందుకు వస్తున్నారు. స్నేహం, సౌజన్యం, సమానవత్వం ముప్పేటగా కలిసి పోయిన మాధవిజాన్ని, మాధవ మానవ ధ్వజాన్ని ముందుకు తీసుకు వెళ్లడానికి ఈ తరం ముందుకు వస్తోంది. వారికి స్వాగతం. నోరు మంచిదయితే వూరు మంచిదవుతుందంటారు, నోరే కాదు చెయ్యి, మనసు కూడా మంచిది కావాలి. అది నిరూపించుకున్నారు శాన్ ఆంటోనియో తెలుగు వాళ్ళు!
Category: 10 comments

10 comments:

కొత్త పాళీ said...

cAlA bAvuMdi. mAdhavarAvugAri guriMci telusukOvaDaM saMtOshaM.

కొత్త పాళీ said...

చాలా బావుంది. మాధవరావుగారి గురించి తెలుసుకోవడం సంతోషం.

harephala said...

మీరు ప్రస్తావించిన వెంకట్ మా (అన్నయ్య గారి)అల్లుడు. మా అమ్మాయి డాక్టరు.అరుణ కూడా తెలుగు భాషకి తనకు చేతనైనంత సేవ చేస్తోంది.

cbrao said...

డెట్రాయిట్, టెక్సాస్ లో సాహితీ చైతన్యం వెల్లివిరుస్తుంది. నిడదవోలు మాలతి గారు కూడా ఇప్పుడు డాలస్ వచ్చేసారని విన్నాను. గోవింద రాజు మాధవరావు గారిని పరిచయం చేసినందుకు ప్రమోదం.

శరత్ 'కాలమ్' said...

మాధవరావు గారి పరిచయం చక్కగా చేసారు.

వాళ్ళింటికి వెళ్ళినప్పుడు దోసకాయ పచ్చడి తెచ్చుకుంటారు సరే. మీ ఇంటికి వస్తే మాకేం ఇస్తారో చెప్పండి.

@ సి బి రావు
అంటే ఏంటి సార్. మా షికాగోలో ఏమీ జరగట్లేదనా మీ ఉద్దేశ్యం? నిజమే. షికాగోలో ఈమధ్య సాహిత్య చైతన్యం ఏమయినా వెల్లివిరుస్తున్నదో లేదో నాకు అయితే అర్ధం కావడం లేదు. రెండేళ్ళ క్రితం కొన్ని సమావేశాలు జయదేవ్ గారి ఆధ్వర్యంలో జరిగేవి కానీ ఇప్పుడు చడీచప్పుడు లేదు. మీకు గానీ ఎవరికయినా గానీ షికాగో సాహితీ కార్యక్రమాల గురించి సమాచారం వుంటే నాకు చెప్పండి.

Afsar said...

@కొత్త పాళీ: ధన్యవాదాలు
@Harephala: అవును, వెంకట్ చాలా యాక్టివ్. సరదాగా కూడా వుంటారు. అరుణ గారిని ఈ సారి కలుస్తాం.
@రావు గారు; అవును టెక్సాస్ ఇప్పుడు ఒక విధంగా అమెరికా తెలుగు సాహిత్య కేంద్రం. మాలతి గారు వచ్చే నెల నెల నెలా వెన్నెలలో కథల మీద మాట్లాడతారు.
@శరత్; మీరు ముందు టెక్సాస్ రాండి. దోసావకాయ మాత్రమే కాదు, టెక్స్-మెక్స్ రుచి చూపిస్తాం. ఇంతకీ మీరేలా వున్నారు?

Rao said...

Madhavarao(Saibabu) & Usha

Abhivandanamulu.

Shanta (Bharathi Pinni) & Visweswararao (Mississauga, Toronto, Canada)

dattu said...

Happy to see this :)

Chitten Raju Vanguri said...

మా (మన) ఆత్మీయులు, నవ్వుతూ అన్ని పనులూ, అందరి పనులూ కూడా వాళ్ళిద్దరే చేస్తూ మన్ననలు పొందుతున్న మాధవ రావు, ఉష దంపతుల గురించి మీ పరిచయం నాకు చాలా ఆనందం కలిగించింది. నాకు ఎప్పుడు, ఎవరు "దండ" వేస్తారా అని చుట్టూ చూసుకునే నా బోటి వారికి వారిద్దరి స్నేహం దక్కడం నా అదృష్టం. శాన్ ఏంటోనియో, ఆ మాటకొస్తే టెక్సస్ లో ఎప్పుడు ఏం కావలసినా నేను మొట్టమొదట సంప్రదించేది మాధవ రావు గారినే అని వేరే చెప్పక్కర లేదు. ఎందుకంటే, ఆయనతో మాట్లాడితే, మొత్తం ఆ నగరంలో ఉన్న తెలుగు, ఇతర భారతీయులందరితోటీ మాట్లాడినట్టే!
తెలియని వారికి మాధవ రావు, ఉషమ్మ ల గురించి మంచి పరిచయం చేశారు. ధన్యవాదాలు.

----వంగూరి చిట్టెన్ రాజు, హ్యూస్టన్, టెక్సస్

Supani said...

AFSAR GARU
CHAKKANI PARIHAYAM DWARA MADHAVARAOGARU USHA GARI AAPYATA AADARAA ARDHAMAYAYI

Web Statistics